ليه بنتضايق لما حد بيعمل صوت و هو بياكل أو يشرب جنبنا؟؟؟

ليه بنتضايق لما حد بيعمل صوت و هو بياكل أو يشرب جنبنا؟؟؟ قاعد مع حماك في عزومة و فجأه لاقيته بيشرب الشاي بصوت مستفز جدا " سووووف حمادة هلال استايل :D " و هو شغال عادي جدا و انتا محرج تقوله ،، شوية شوية ينزل الأكل تلاقي حماتك عماله تاكل بصوت !! برضة تبص لها عاوز تقولها تبطل بس مش عارف تجيبها ازاي ! بس اشمعنا ؟؟ ليه انتا بتتضايق من الأصوات ديه و غيرك عادي .. الـ misophonia و هي ظاهرة التفاعل السلبي مع بعض الاصوات , ففي اصوات معينه بتخلي شخص يحس بمشاعر سلبيه زي الضيق أو الألم .. و ده بيكون نتيجة تواصل بين مركز السمع في مخ الانسان و مراكز الاحساس و ادراك المشاعر الـ limbic system .. بس التواصل ده مش ثابت في كل ناس , يعني كل واحد بيكون عنده بمقدار اعلي أو اقل من التاني .. و ده اللي بيخليك تبقي حساس اكتر لاصوات معينه , بس برضة ليه في التوصلات الدقيقة ديه ؟؟ الموضوع له علاقة بالانسان الأول لما كانت الاصوات الغريبة ديه بتسبب له إنذار مهم في حياته , فتخيل انتا قاعد في كهف و سامع صوت خربشة رجول حشره ما علي الحيطه ! هنا لازم مركز المشاعر يشتغل عندك عشان يخوفك و يحسسك بالألم فتتحرك ! .. بس مع التقدم الانساني و زيادة نسبة الامان عند البشر لسه التوصلات بتاعة المخ ديه موجودة , و اللي بتشتغل لما حد ياكل او يشرب جنبك .. في النهاية لما حماك او حماتك يكونوا بيشربوا او ياكلوا جنبك بيكون قدامك فرصة انك تكبر دماغك و تعدي الموقف ففي النهاية دول أهلك التانين :) .. و برضة ممكن تقعد تشرح لهم السبب و تقولهم limbic system و misophonia و الانسان الاول و ان قد ايه الحركة ديه رخمة و مستفزة ,, فيقولوا عليك مجنون او عبيط و يخافوا علي بنتهم منك فيفركشوا الجوازة و تبقي برضة انتا الكسبان

شارك الموضوع إذا أعجبك

share

masonline